Një studim i ri sugjeron se edhe sasitë e vogla të alkoolit mund të kenë ndikim negativ në shëndetin e trurit, duke vënë në pikëpyetje idenë se ekziston një nivel “i sigurt” i konsumit. Studiuesit analizuan të rriturit të shëndetshëm që nuk e tejkalonin kufirin e konsideruar me “rrezik të ulët” dhe përdorën skanime MRI për të vlerësuar efektet në tru.
Rezultatet treguan një lidhje të qartë midis konsumit më të lartë të alkoolit dhe uljes së qarkullimit të gjakut në tru. Ky proces është thelbësor për furnizimin e trurit me oksigjen dhe lëndë ushqyese.
Reduktimi i rrjedhjes së gjakut u vu re sidomos në zonat frontale dhe temporale, të cilat lidhen me të menduarit, kujtesën dhe gjuhën, shkruan burimi Medical News Today transmeton Gazeta Shneta.
Efekti ishte edhe më i theksuar tek të moshuarit.
Kombinimi i moshës së avancuar dhe konsumit të vazhdueshëm të alkoolit gjatë jetës u shoqërua me ulje më të madhe të qarkullimit të gjakut dhe hollim të korteksit të trurit, një faktor që mund të rrisë rrezikun për rënie njohëse dhe demencë.
Studimi sugjeron se edhe konsumimi i moderuar nuk është plotësisht i padëmshëm. Dëmtimet mund të lidhen me stresin oksidativ, i cili shkakton dëmtim të qelizave dhe lidhet me plakjen dhe inflamacionin.
Megjithatë, studiuesit theksojnë se nevojiten kërkime më të gjera për të konfirmuar këto gjetje, pasi numri i pjesëmarrësve në këtë studim ishte relativisht i vogël. /Gazeta Shneta/