Oda e Infermierëve të Kosovës ka dal me një reagim për shqetësimet e infermierëve në lidhje me mos pagesat e shtesave në pagë sipas Ligjit të ri të Pagave.
Nga OIK kanë deklaruar se kjo çështje është ngritur që nga muaji shkurt duke rikujtuar se kërkesat e tyre nuk ishin marrë parasyshë për shkak të mungesës së komunikimit nga mekanizmat e Qeverisë.
Reagimi i plotë:
Oda e infermierëve, mamive dhe profesionistëve tjerë shëndetësorë është duke përcjellur me shqetësim zhvillimet që kanë të bëjnë me infermierët dhe pagesat e tyre.
Qysh në muajin shkurt, Oda ka reaguar ashpër duke bërë me dije se draftimi i Ligjit për Pagat është përcjellur me mungesë të komunikimit ndërmjet mekanizmave përgjegjës qeveritarë dhe Odës.
Ky mos komunikim ka vazhduar dhe OIK kërkon urgjentisht të marrë një përgjigje zyrtare nga Qeveria dhe mekanizmat përgjegjës për mënyrën e përllogaritjes së pagesave ndaj komunitetit infermieror, përfshirë infermierët, mamitë dhe profesionistët tjerë shëndetësorë.
Kjo për faktin se situata e krijuar ka shkaktuar konfuzitet dhe pakënaqësi tek komuniteti duke bërë që anëtarët e Odës të jenë në një pozicion shumë të pafavorshëm dhe demotivues.
Andaj, shpresojmë që ky të jetë alarmi i fundit për përgjegjësit që përmes veprimeve të tyre po ndikojnë në diskriminimin e infermierëve,
mamive dhe profesionistëve tjerë shëndetësorë.