Substancat psikedelike mund të ndihmojnë një ditë në trajtimin e sëmundjeve mendore, por provat aktuale nuk janë të mjaftueshme për t’i ofruar ato si terapi, sipas një raporti të ri nga Kolegji Mbretëror i Psikiatërve në Mbretërinë e Bashkuar.
Pas dekadash kufizimesh, interesimi shkencor për substancat si MDMA, ketamina, LSD dhe psilocibina – përbërësi aktiv i kërpudhave “magjike” – është rritur ndjeshëm, shkruan burimi Euronews Health transmeton Gazeta Shneta.
Në Britani, Evropë dhe SHBA po zhvillohen disa prova klinike të avancuara për të testuar efektet e tyre në ankth, depresion, çrregullim të stresit post-traumatik (PTSD) dhe varësi. Zakonisht, këto trajtime shoqërohen me terapi bisedash për të përforcuar efektin.
Megjithatë, raporti thekson se provat nuk janë ende të mjaftueshme për përdorim rutinë në psikiatri.
“Jemi të kujdesshëm por optimistë,” tha profesori Oliver Howes, autor i raportit dhe kryetar i komitetit të psikofarmakologjisë, duke shtuar se potenciali është i madh, por po ashtu edhe kompleksiteti. Ai bëri thirrje për një qasje “me shkencë të matur dhe kujdes”.
Një sfidë kryesore në kërkimin mbi psikedelikët është fakti se pjesëmarrësit shpesh e kuptojnë nëse kanë marrë substancën apo një placebo, çka rrezikon të shtrembërojë rezultatet. Për më tepër, shumë gjetje janë të vështira për t’u riprodhuar.
Studiuesit kërkojnë më shumë prova mbi sigurinë, efikasitetin dhe përdorimin afatgjatë, si dhe krijimin e një databaze qendrore.
Ndërkohë, disa vende si Gjermania kanë nisur programe përdorimi të kufizuar, ndërsa Çekia pritet të legalizojë psilocibinën për trajtimin e depresionit në vitin 2026.
Ekspertët paralajmërojnë qytetarët të mos vetë-mjekohen, por të marrin pjesë vetëm në prova klinike të udhëhequra nga ekipe psikiatrike. /Gazeta Shneta/