Autoritetet evropiane të shëndetit kanë paralajmëruar se vendet e kontinentit duhet të rrisin përpjekjet për të luftuar gripin e zogjve, pas një numri “të paprecedent” shpërthimesh këtë vjeshtë.
Influenza aviare po përhapet shpejt tek zogjtë e egër dhe në fermat e pulave; që nga shtatori janë regjistruar mbi 1,400 raste në të paktën 26 vende evropiane – katër herë më shumë se një vit më parë dhe niveli më i lartë që nga viti 2016, raporton Euronews Health transmeton Gazeta Shneta.
Qendra Evropiane për Parandalimin dhe Kontrollin e Sëmundjeve (ECDC) paralajmëron se përhapja masive tek zogjtë rrit rrezikun që virusi të infektojë njerëzit.
Në vitet e fundit, virusi është përhapur në nivel global dhe ka kaluar herë pas here tek disa gjitarë, përfshirë dhelpra dhe macet. Shkencëtarët thonë se kjo mund të përbëjë një kërcënim potencial për një pandemi.
Edoardo Colzani, drejtori i ECDC për viruset respiratore, theksoi se edhe pse rreziku aktual për njerëzit është i ulët, influenza aviare mbetet një kërcënim serioz për shëndetin publik për shkak të shpërthimeve të gjera mes kafshëve.
Agjencia rekomandon rritjen e monitorimit të virusit dhe testeve laboratorike, sigurimin e pajisjeve mbrojtëse për personat me rrezik më të lartë, si punonjësit e fermave, dhe komunikim të qartë me publikun.
ECDC gjithashtu thekson bashkëpunimin e ngushtë ndërmjet autoriteteve veterinare, bujqësore dhe shëndetësore, për të siguruar që sinjalet paralajmëruese të mos injorohen dhe veprimet publike të jenë të shpejta, të koordinuara dhe efektive.
Shumica e infeksioneve këtë vjeshtë janë regjistruar tek zogjtë ujorë, përfshirë edhe ato që dukeshin të shëndetshëm, dhe janë shkaktuar nga një variant i ri i virusit që po përhapet shpejt në Evropë. /Gazeta Shneta/