Një mjek në Emergjencën e Spitalit të Vushtrrisë është kërcënuar me thikë nga disa familjarë të një pacienti, të cilin mjeku me iniciale I.R. ishte duke e trajtuar.
Ndaj këtij sulmi kanë reaguar Federata e Sindikatave të Shëndetësisë të cilët kanë thënë se do të përdorin të gjitha mjetet për të mbrojtur punëtorët shëndetësorë dhe anëtarët e saj, transmeton Gazeta Shneta.
Reagimi i plotë:
Pas njoftimit të marr nga ana e Sindikatës së QKMF Vushtrri, Federata e Sindikatave të Shëndetësisë së Kosovës përmes kësaj Komunikate dënon ashpër kërcënimin me armë të ftohtë ndaj mjekut kujdestar në QKMF-Vushtrri me iniciale I.R.
Mjeku kujdestar I.R. gjatë orarit të punës ka trajtuar pacientin N.N. dhe të njejtit i ka ofruar shërbimin shëndetësor konform gjendjes shëndetësore të paraqitur në Urgjencën e QKMF Vushtrri,por edhe përkundër ofrimit të shërbimit shëndetësor ndaj pacientit N.N. familjarët e tij i janë kërcënuar me armë të ftohtë mjekut.
FSSHK në vazhdimësi ka ngritur zërin e saj për të gjitha rastet e dhunës së ushtruar ndaj punëtorëve shëndetësor, kërcënimeve dhe shantazheve të cilat ndikojnë drejtëpërsëdrejti në ushtrimin e profesionit por edhe ofrimin e shërbimeve shëndetësore.
FSSHK do të përdorë të gjithë autoritetin në mbrojtje të punëtorëve shëndetësor dhe anëtarëve të saj. Ngrisim zërin tonë, të vendosur që të mbrojmë dinjitetin dhe vlerën njerëzore, që një herë e përgjithmonë këto veprime barbare të ndalen dhe të gjejnë dënimin meritor për kryerësit e këtyre veprimeve.
FSSHK bashkëndjen shqetësimin dhe frustrimin e punëtorëve shëndetësor të cilët ofrojnë shërbime emergjente duke qenë se rastet më të shpeshta të sulmeve po ndodhin në këto shërbime ku cilësia është në nivelin më të lartë duke marr parasysh mënyrën e shpejtë të intervenimit dhe të trajtimit të pacientëve në këto njësi.
Duke parë këtu edhe dështimin e sistemit gjyqësor(sipas shkrimeve kriminelët janë liruar në procedurë të rregullt) FSSHK do të jetë e detyruar që ti ndërmerr edhe masat më radikale që në ditët në vijim të marr vendim edhe për mos ofrimin e shërbimeve emergjente pasi që Ligji në mbrojtje të punëtorëve shëndetësor po dështon.