Administrata Amerikane e Ushqimit dhe Barnave (FDA) ka miratuar Leqembi Iqlik, një version nënlëkuror i barit lecanemab, i cili përdoret për pacientët me sëmundjen e Alzheimerit në fazën e dëmtimit të lehtë kognitiv ose demencës së lehtë.
Forma e re e injektimit, që realizohet me autoinjektor nënlëkuror, lejon aplikimin e trajtimit në vetëm 15 sekonda dhe është menduar të përdoret pas 18 muajve të parë të dozimit intravenoz.
Pas kësaj periudhe, pacientët mund të zgjedhin të vazhdojnë me infuzione mujore intravenoze ose të kalojnë në injeksione javore prej 360 mg nën lëkurë.
Sipas ekspertëve, ky zhvillim synon ta bëjë trajtimin më të thjeshtë dhe më të aksesueshëm, duke lehtësuar ngarkesën e pacientëve dhe familjarëve të tyre, shkruan HealthDay transmeton Gazeta Shneta.
“Kjo është një hap i rëndësishëm drejt ditës kur pacientët mund të shmangin plotësisht infuzionet dhe të marrin trajtimin në kushte më të thjeshta, madje edhe në shtëpi,” tha Howard Fillit, bashkëthemelues dhe drejtor shkencor i Alzheimer’s Drug Discovery Foundation.
Miratimi i FDA-së është mbështetur nga të dhënat e fazës së tretë të studimit Clarity AD, të cilat treguan se kalimi nga trajtimi intravenoz tek injeksioni nënlëkuror ruan përfitimet klinike dhe biomarkerët në të njëjtin nivel me trajtimin IV.
Një tjetër avantazh i rëndësishëm është profili i sigurisë. Reagimet sistemike janë shfaqur në më pak se 1 për qind të pacientëve me formën nënlëkurore, krahasuar me rreth 26 për qind tek ata që morën infuzione intravenoze.
Shkalla e anomaleve të lidhura me imazherinë e amyloidit ka rezultuar e ngjashme mes të dy formave të trajtimit./Gazeta Shneta/