Jeni të shqetësuara se fëmija juaj flet në gjumë? Mos u shqetësoni sepse është e zakonshme që fëmijët të flasin në gjumë. Sipas ekspertëve rreth 10% e fëmijëve e kanë zakon të flasin në gjumë për të paktën 2 netë në javë. Disa fëmijë mund të flasin shumë qartë ndërsa disa të tjerë thjesht belbëzojnë fjalë.
Mos u shqetësoni pasi e folura në gjumë nuk e dëmton fëmijën, madje me disa ndryshime të vogla fëmija mund ta humbasë këtë zakon.
Çfarë duhet të bëni?
Ndiqni një rutinë të rregullt gjumi
Sigurohuni që fëmija juaj të ndjekë një rutinë të rregullt gjumi çdo ditë. Rutina duhet të ketë një orar fiks për të fjetur dhe një orar fiks për tu zgjuar në mëngjes.
Sigurohuni të flejë mjaftueshëm
Si prind i tij është përgjegjësia juaj të siguroheni që ai po fle mjaftueshëm. Një fëmijë që pushon sa duhet ka më pak mundësi të flasë në gjumë.
Sigurohuni që ai të jetë aktiv gjatë ditës
Nëse fëmija juaj do të ketë një ditë aktive, ai do të kalojë një natë të qetë. Ndaj inkurajojeni të dalë e të luajë jashtë apo të përfshihet në ndonjë aktivitet sportiv. Edhe aktivitetet si vizatimi dhe lojërat formuese e sfidojnë mendërisht fëmijën kështu që ai do të bëjë një gjumë më të qetë gjatë natës.
Mos e lejoni të hajë rëndë përpara gjumit
Darka duhet të jetë një vakt i lehtë dhe duhet të konsumohet 2 deri në 3 orë përpara gjumit nëse doni që fëmija juaj të bëjë gjumë të qetë.
Sigurohuni që fëmija të ndihet rehat
Rehatia e fëmijës tuaj gjatë natës është shumë e rëndësishme. Rrobat e tij duhet të jenë të lirshme që të mos pengojnë frymëmarrjen. Ndërsa batanija nuk duhet të pengojë lëvizjet e tij dhe temperatura e dhomës duhet të rregullohet në mënyrë që ai të mos ketë as ftohtë e as vapë.
Duke ndjekur këto këshilla të thjeshta ju do ta ndihmoni atë ta humbasë zakonin e të folurit në gjumë. Por nëse fëmija juaj flet në mënyrë të inatosur dhe agresive kur është në gjumë atëherë duhet të kërkoni ndihmë mjekësore.