Pas mbledhjes së Kuvendit Komunal të Ferizajit në lidhje me tokën e cila ishte destinuar për ndërtimin e një spitali të ri që po planifikohet është arritur një marrëveshje, dhe ndërtimi pritet të fillojë më 12 qershor, e që përkon të jetë edhe dita e çlirimit të Ferizajit.
Derisa, drejtori për urbanizëm dhe mjedis Lulzim Aliu pohon se akoma është në fazën përgatitore për këtë projekt nga se të gjitha paqartësitë dhe barrierat ligjore tashmë duket se janë eliminuar.
Ai ka thënë se të gjitha ato vendime që janë marrë ditën e djeshme janë që do të jenë valide dhe fillimi i ndërtimit fillon pikërisht me 12 qershor. Aliu ka shtuar se problemet më të mëdha i kanë pasur me Ministrinë e Planifikimit, por që janë zgjidhur në bazë të interpretimit të ligjit.
‘’Dua të them se të gjitha vendimet që i kemi marrë edhe më herët, me 30 Mars, të cilat dje i kemi anuluar kanë qenë në përputhshmëri të plotë me udhëzimet që na ka dhënë Ministria para katër muajsh, kur kemi vendosur që të shqyrtojmë edhe njëherë PZHK-në për të përmirësuar disa gabime teknike që kanë qenë në PZHK e par të cilat ata nuk na kanë lejua’’, ka shtuar më tej Aliu.
E, kundër këtij projekti ditën e djeshme mjaft të zëshëm kanë qenë edhe opozitarët të cilët e shohin këtë si fazë të dëmshme dhe mund të ketë edhe reagime nga niveli qendror.
“Edhe dje në mbledhjen e Kuvendit jam munduar me i sqarua dilemat dhe paqartësitë që i ka vet Ministria dhe dua ta them edhe këtë se gjithë këtë kaos të interpretimit të PZHK-së është bërë nga Ministria e Planifikimit dhe Mjedisit sepse ata vet kanë paqartësi shumë të mëdha në interpretim të ligjit dhe udhëzimeve administrative” ka pohuar Aliu.
Ky spital i ri për qytetin e Ferizajt është bërë me kërkesën e po këtij institucioni që ky objekt të ndërtohet në territorin afër me ish tregun e kafshëve. Në parcelën e re thuhet se ka hapësirë më shumë dhe se duhet modifikuar elementet e ndërtimit, siç transmeton Televizioni Liria.