Në QKUK ka nisur për herë të parë aplikimi i metodës moderne për trajtimin e epilepsisë së rëndë – stimulimi i nervit vagus (VNS).
Ky trajtim u bë i mundur falë përgatitjeve disa vjeçare të Klinikës së Neurologjisë dhe bashkëpunimit me Klinikën e Neurokirurgjisë, si dhe me ndihmën e neurokirurgut italian, dr. Leonardo Fiori.
Kështu bëri të ditur Shoqata e Neurologjisë e Kosovës, ku tutje njoftoi se me 2 dhe 3 qershor, janë operuar tre pacientët e parë me epilepsi farmakorezistente, të cilët nuk kanë pasur përmirësim nga barnat antiepileptike, shkruan Gazeta Shneta.
Ndërhyrja u krye në sallën e kirurgjisë në QKUK, me asistimin e neurokirurgëve vendorë dhe mbikëqyrjen e ekipit të anestezionit dhe neurologjisë.
Metoda VNS përfshin vendosjen e një pajisjeje të vogël që stimulon nervin vagus dhe ndihmon në kontrollimin e krizave epileptike.
Ky shërbim i ri pritet të jetë një ndihmesë e madhe për pacientët që më parë detyroheshin të kërkonin trajtim jashtë vendit, me kosto të lartë.
Ky trajtim tashmë do të ofrohet brenda SHSKUK për pacientët e përzgjedhur me këtë formë të epilepsisë./Gazeta Shneta/