Një nga anijet kryesore të Flotiljes Globale për në Gaza raportohet se u godit nga një dron në ujërat tuniziane, tha flotilja, duke shtuar se asnjë nga gjashtë pasagjerët dhe ekuipazhi nuk u lëndua, por Garda Kombëtare Tuniziane e mohoi raportin, duke thënë se shpërthimi ndodhi brenda anijes.
Anija me flamur portugez u përfshi nga flakët në kuvertën kryesore dhe në një dhomë depozitimi poshtë kuvertës, tha Flotilja Globale në një deklaratë, raporton Reuters.
Një zëdhënës i gardës kombëtare tuniziane i tha radios Mosaique se raportet për një sulm me dron ndaj flotiljes “nuk bazoheshin në të vërtetën”, duke shtuar se hetimet fillestare treguan se shpërthimi ndodhi brenda anijes.
Pas sulmit, dhjetëra njerëz u mblodhën në portin tunizian Sidi Bou Said, ku u ankoruan anijet e flotiljes, duke valëvitur flamuj palestinezë dhe duke brohoritur “Palestina e Lirë”.
Flotilja e Gazës tha se një hetim për sulmin me dron ishte duke vazhduar dhe se rezultatet e tij do të publikoheshin sapo të ishin të disponueshme.
“Ne nuk do të frikësohemi nga një akt agresioni që synon frikësimin dhe prishjen e misionit tonë. Ne do të vazhdojmë me vendosmëri misionin e paqes, të cilin duam ta përfundojmë me qëllim që t’i japim fund rrethimit të Gazës dhe të tregojmë solidaritet me popullin”, u tha në deklaratë.
Një flotilje me dhjetëra anije të ngarkuara me ndihma humanitare për Gazën u nis nga porti i Barcelonës më 1 shtator.
Qëllimi i flotiljes është të thyejë bllokadën dhe të dorëzojë furnizime humanitare në enklavë, e cila është shkatërruar nga pothuajse dy vjet luftë. Grupe nga 44 vende marrin pjesë në flotilje, dhe aktivistja e klimës Greta Thunberg është midis tyre.