Nga e diela, në Francë hyn në fuqi një ndalim i ri i duhanit në plazhe, parqe, kopshte publike dhe stacione autobusi, sipas një dekreti të publikuar të shtunën në gazetën zyrtare të qeverisë.
Masa do të shtrihet gjithashtu jashtë shkollave, pishinave dhe bibliotekave, me qëllim mbrojtjen e fëmijëve nga tymi pasiv.
Ministrja e Shëndetësisë dhe Familjes, Catherine Vautrin, tha se “duhani duhet të zhduket nga vendet ku ka fëmijë”, duke theksuar të drejtën e tyre për të marrë frymë ajër të pastër.
Ata që shkelin ndalimin do të gjobiten me 135 euro. Megjithatë, ndalesa nuk përfshin cigaret elektronike dhe as verandat e kafeneve.
Çdo vit në Francë vlerësohet se rreth 75,000 persona humbin jetën nga komplikime të lidhura me duhanin.
Një sondazh i fundit tregon se 62% e francezëve mbështesin ndalimin e duhanit në vendet publike./Gazeta Shneta/