Federata e Sindikatave të Shëndetësisë ka anuluar protestën e paralajmëruar për nesër, pas takimit me ministrin e Shëndetësisë Armend Zemaj.
FSSHK ka deklaruar se Zemaj është zotuar se do të plotësohen kërkesat e sindikalistëve, dhe për këtë ka marr mbështetjen edhe nga kryeministri Avdullah Hoti, shkruan Gazeta Shneta.
“Federata e Sindikatave të Shëndetësisë së Kosovës njofton opinionin e gjerë dhe gjithë anëtarësinë se pas komunikimit me Ministrin e Shëndetësisë Z. Armend Zemaj për gjatë takimit të zhvilluar dje me datën 10.08.2020, i cili u zotua se kërkesat e FSSHK-së do të realizohen dhe për këtë ka marr edhe mbështetjen e Kryeministrit, si dhe pas Vendimit për ndalimin e Protestës nga ana e organeve të rendit, Këshilli Organizativ i Protestës duke i respektuar zotimet e Ministrit, institucioneve shtetërore të MPB-së si dhe shëndetin e popullatës merr vendim që të PEZULLOJË Protestën e paraparë me datë 12.08.2020 dhe ti hap rrugë dialogut social”, thuhet në njoftim.
Zemaj gjatë ditës së djeshme ka deklaruar se janë dakorduar me kryeministrin Hoti që punëtorëve shëndetësorë t’iu paguhen shtesat nga 300 euro deri në përfundimin e pandemisë.
“Si ministër i Shëndetësisë sot kam kërkuar nga Kryeministri z. Avdullah Hoti, që deri në përfundim të pandemisë, punonjësve shëndetësorë t’u paguhet shtesa në të ardhura personale deri në 300 euro në muaj, bazuar në kategorizimin e bërë sipas rrezikshmërisë së drejtpërdrejtë nga virusi Covid-19. Kërkesë e cila gjeti mbeshtetjen dhe mirëkuptimin e Kryeministrit”, ka deklaruar Zemaj. /Gazeta Shneta/