Federata e Sindikatave të Shëndetësisë e ka rikonfirmuar protestën e cila do të mbahet më 14 nëntor para Ministrisë së Shëndetësisë.
Kjo është bërë e ditur përmes një njoftimi për media ku theksohet se vendimi për protestë është marr nga Kryesia e FSSHK-së më 31 tetor, shkruan Gazeta Shneta.
Nga FSSHK kanë deklaruar se përmes kësaj proteste do të shprehet pakënaqësia me rritjen e vogël të koeficientit, mosnënshkrimin e Kontratës Kolektive dhe ndërprerjen e dialogut social.
Njoftimi i plotë nga FSSHK:
Federata e Sindikatave të Shëndetësisë së Kosovës ka vendosur të organizojë një Protestë më 14 Nëntor 2024, në ora 11:00,para Ministrisë së Shëndetësisë.Vendimi për protestë u mor në mbledhjen e rregullt të Kryesisë më 31.10.2024,ku u diskutuan sfidat kryesore që po përballet sektori i shëndetësisë në Kosovë.
Me këtë protestë,FSSHK shpreh pakënaqësinë e thellë për ndërprerjen e dialogut social me Ministrinë e Shëndetësisë,mospajtimin me propozimin e qeverisë për një rritje të vogël të koeficientit prej 0.5, si dhe mosnënshkrimin e Kontratës Kolektive Sektoriale.
FSSHK thekson se këto veprime pengojnë përmirësimin e kushteve të punës dhe zhvillimin e një sistemi shëndetësor më të qëndrueshëm dhe të drejtë për të gjithë profesionistët shëndetësor.