Fundjava më e freskët me reshje lokale shiu

2017-04-29 në ora 08:17

Nga Atlantiku një turbullirë ka filluar të depërtojë mbi Itali, e gjatë ditëve të fundjavës do të kalojë edhe mbi rajonin tonë, duke sjellur mot të paqëndrueshëm, më të freskët, me reshje lokale shiu, që vende-vende do të shoqërohen edhe me bubullimë.

Të shtunën do të mbajë mot kryesisht i vranët, kohëpaskohe me reshje lokale shiu, me mundësi edhe për bubullimë, ndërsa ditën e diel mot më i freskët, kryesisht me vransira, dhe me reshje të dobëta shiu, të cilat do të vazhdojnë nëpër lokalitete edhe gjatë pasdites dhe mbrëmjes.

Në fillim të javës së ardhshme do të mbajë mot më i ngrohtë, pjesërisht i vranët, e gjatë orëve të pasdites priten edhe riga lokale shiu, të hënën të shoqëruara edhe me bubullima.

Temperaturat e ajrit në fundjavë do të pësojnë rënie të lehtë rreth vlerave mesatare, me minimale që do të zbresin deri në 6C, e maksimalet në 15C. Në fillim të javës, minimalet do të luhaten nga 7C deri në 8C, e ato maksimale nga 19C deri në 22C.

Era do të fryejë e lehtë dhe mesatare nga jugu dhe verilindja 2-6m/s. Shtypja atmosferike do luhatet rreth vlerave normale.