Klinika e Onkologjisë në QKUK nuk është duke u furnizuar vazhdueshëm me barna. Disa mungojnë e disa të tjerë vijnë me vonesë.
Në Klinikën e Onkologjisë në QKUK ku trajtohen pacientët me sëmundje të kancerit, furnizimi me barna nuk është stabil dhe i vazhdueshëm, shkruan Gazeta Shneta.
Një nga ilaçet që ju jepet grave me kancer të gjirit, Tamoxifen, ka munguar për disa javë. Ky produkt që shërben si terapi hormonale dhe ka për qëllim parandalimin e rikthimit të kancerit, është dorëzuar në klinikë të premten.
Pacientet me kancer javën e kaluar janë ankuar në adresë të Gazetës se ky produkt ka munguar mbi 2 muaj. Por SHSKUK të premten në orët e pasdites ka njoftuar se klinika është furnizuar.
Ndërkaq në këtë klinikë mungon një ilaç tjetër, Anastrazol. Ky produkt përdoret për të trajtuar kancerin e hershëm të gjirit me receptorë hormonalë pozitivë. Gjithashtu, përdoret si trajtim i parë për kancerin e gjirit të avancuar ose metastatik (kur kanceri është përhapur), i cili është me receptorë hormonalë pozitivë ose me status të panjohur të receptorëve hormonalë.
Nga QKUK kanë deklaruar se presin që të furnizohen këtë javë edhe me këtë produkt. /Gazeta Shneta/