Qendra Klinike Universitare e Kosovës ka bërë një gafë me një postim në faqen zyrtare në Facebook, ku është vet lavdëruar se ka pranuar një rast të cilin sipas tyre nuk guxuan ta pranojnë spitalet private.
Në postimin e QKUK-së thuhet se mjekët e repartit të Endoskopisë në Klinikën e Kirurgjisë ia kanë hequr një pacienti tumorin me përmasa të mëdha në zorrën e trashë, shkruan Gazeta Shneta.
Në këtë njoftim nuk tregohet madhësia e tumorit, por thuhet se intervenimi është bërë me endoskop dhe pa hapje kirurgjike.
Sipas QKUK-së spitalet private nuk kanë guxuar ta pranojnë pacientin për shkak të mundësive të komplikimeve, dhe këtë rast e kanë marr përsipër kirurgët e QKUK-së.
“Për shkak të mundësisë së komplikimeve, atë nuk ka pranuar ta operojë asnjëri nga spitalet private. Sipas mjekëve, pacienti është liruar në shtëpi tri ditë pas operimit, me një gjendje stabile shëndetësore”, thuhet në njoftim.
Në fotografitë e publikuara nga QKUK shihet kirurgu Arbër Morina duke kryer intervenimin. /Gazeta Shneta/
