Janë bërë gati dy vjet nga bastisja e klinikave private të cilat kryejnë IVF dhe hetuesia ende nuk ka arritur të ngrit ndonjë aktakuzë për këtë rast.
Policia e Kosovës në bashkëpunim me Inspektoratin Shëndetësor dhe Prokurorinë, patën bastisur disa klinika private të cilat merren me shërbimin e fekondimit të asistuar mjekësor, shkruan Gazeta Shneta.
Policia dhe Inspektorati Shëndetësor kishin bastisur klinikat “Bahceci”, Klinikën Amerikane, Spitalin Lindja, Sirona, Spitalin Amerikan dhe Klinikën Gjermane.
Në këto klinika ishin arrestuar edhe një numër i mjekëve dhe embriologëve nën dyshimet për transfer të paligjshëm të qelizave dhe embrioneve.
Në mesin e tyre, kishte edhe mjekë me shtetësi turke të cilët punonin në “Bahceci”.
Në anën tjetër Inspektorati Shëndetësorë ua kishte konfiskuar të gjitha klinikave tanket me embrione dhe qeliza dhe të njëjtat u mbajtën për më shumë se një vit në Klinikën e Gjinekologjisë në QKUK. Poashtu ISH gjobiti me nga 20 mijë euro pothuajse të gjitha klinikat dhe ua ndërpreu shërbimin për një vit.
Në anën tjetër hetimet kishin nisur edhe nga Prokuroria e shtetit por deri më tani nuk është ngritur asnjë aktakuzë. Gazeta Shneta ditë më parë ka raportuar se Prokuroria ka kërkuar ekspertizë për testet PGD të kryera në Spitalin “Bahceci” nën dyshimin për përcaktimin e gjinisë gjatë procedurave të IVF-së.
Dyshimet e njëjta janë edhe për klinikat tjera. /Gazeta Shneta/