Qendra e Mjekësisë Familjare në Prishtinë raporton se në 3 vitet e fundit nuk janë furnizuar plotesisht me barna dhe materiale shpenzuese sipas listës esenciale nga Ministria e Shëndetësisë. Furnizimi ka pasur lëvizje nga 20% deri në 50%, duke përfshirë këtu barna dhe materiale shpenzuese, shkruan Gazeta Shneta
Bujar Gashi, Drejtor i Qendrës së Mjekësisë Familjare në Prishtinë, ka theksuar se për këtë arsye është e nevojshme që Komuna e Prishtinës të ketë një kontratë mbeshtetëse për furnizim, për të mbuluar mungesat e medha nga Ministria.
“Komuna e Prishtinës ka shpenzuar afër 500,000 euro për këto furnizime esenciale për banorët e Kryeqytetit”, tha Gashi.
Ai gjithashtu bën të ditur se ka ndryshime të vazhdueshme në listën esenciale për mungesat e barnave dhe materialeve shpenzuese.
“Ka ndryshime në listën esenciale në lidhje me mungesat. Ka mungesa nga më të thjeshtat e më të lirat deri te ato më të rëndësishmet, të cilat janë thuajse vitale. Të gjitha këto janë esenciale dhe mëse të nevojshme.”, ka thënë Gashi.
Drejtori Gashi theksoi se infrastruktura është përmirësuar dukshëm nëpërmjet renovimeve të fundit, të cilat pritet të vazhdojnë edhe në këtë vit.
“Sa i përket stafit, Komuna e Prishtinës nuk ka pasur ndonjëherë rritje të numrit të punonjësve shëndetësorë që nga paslufta. Qkmf, me njesitë e saj, ka rreth 750 punonjës shëndetësorë, punonjës teknik dhe administrativ, të cilët janë shumë pak në numër për të mbuluar nevojat e qytetarëve të Kryeqytetit dhe atyre që jetojnë në Kryeqytet dhe nuk janë banorë të Prishtinës. Në realitet, ata janë gati sa numri zyrtar i banorëve”, ka shtuar drejtori Gashi.
Në kujdesin paresor, raportohet se ofrohen rreth 9000 shërbime në ditë, ndërsa vitin 2023 janë ofruar rreth 3,500,000 shërbime./GazetaShneta/