Gazetari Bujar Vitija është kërcënuar nga Abdyl Gashi, babai i anesteziologut Kemajl Gashi.
Abdyl Gashi e ka kërcënuar Vitinë, pasi ky i fundit ka publikuar lajmin për anesteziologun Kemajl Gashi, i cili ka lënë punën gjatë kujdestarisë në QKUK dhe ka shkuar për të punuar në një spital privat. Për këtë shkelje ai është gjobitur me një mijë euro.
Gazetari Vitija e ka raportuar rastin në Policinë e Kosovës, e cila e ka cilësuar si Kanosje dhe po heton rastin.
Për këtë ka reaguar edhe Asociacioni i Gazetarëve të Kosovës të cilët e kanë quajtur si kërcënim të rëndë.
AGK-ja dënon kërcënimin ndaj gazetarit Bujar Vitija:
Gazetari i portalit “gazetashneta.net”, Bujar Vitija e ka njoftuar AGK-në se është kërcënuar nga një person që supozohet se është babai i anesteziologut, Kemajl Gashi për të cilin portali ka raportuar se është dënuar nga Inspektorati Shëndetësor për shkak të lënies së vendit të punës në kohën e kujdestarisë në QKUK.
“Paske shkru diqka. Veten ski me njoft. Shum shpejt kemi mu taku”, i ka shkruar gazetarit Vitija, mes tjerash ky person. AGK-ja e vlerëson kërcënimin të rëndë dhe që rrezikon sigurinë e gazetarit.
AGK-ja kërkon nga Policia ta trajtojë me seriozitet këtë rast, pas paraqitjes nga ana e gazetarit.