Në kuadër të muajit tetor, që njihet si muaj i ndërgjegjësimit kundër kancerit të gjirit, u.d. ministrja e Shëndetësisë, Dafina Gexha, kryesuesja e Bordit Drejtues të ShSKUK-së, Agreta Gashi dhe drejtori i përgjithshëm i ShSKUK-së, Valbon Krasniqi, kanë vizituar Klinikën e Onkologjisë të Qendrës Klinike Universitare të Kosovës.
Me këtë rast, u.d. ministrja e Shëndetësisë, tha se janë të përkushtuar për përgatitjen e planit nacional për sensibilizimin dhe ndërgjegjësimin për kancerin e gjirit.
“Tetori njihet si muaji i ndërgjegjësimit të kancerit të gjirit, e shprehur në veçanti tek gratë. Të dhënat tregojnë se 1 në 8 gra preken nga kanceri i gjirit dhe vetëm trajtimi i hershëm e rritë shkallën e mbijetesës. Nga të dhënat e Klinikës së Onkologjisë, në nëntë muajt e fundit janë trajtuar 400 gra. Bashkëpunimi i institucioneve shëndetësore, profesionistëve shëndetësor, mbetet arma më e fortë për parandalimin e kancerit të gjirit. Inkurajojmë gratë dhe burrat që ta rrisin kujdesin dhe vetëkontrollin”, potencoi ministrja Gexha.
Drejtori i Përgjithshëm i ShSKUK-së, Valbon Krasniqi, tha se përkundër situatës dhe gjendjes pandemike, ShSKUK ka arritur të avancojë shërbimet për parandalimin dhe diagnostikimin e kancerit të gjirit.
Ai përmendi diagonostikimin e hershëm që bëhet për herë të parë në Institutin e Patologjisë me metoda të avancuara, këshillat psikologjike, por edhe mamografin mobil, i cili do të lëvizë në komuna të ndryshme, ku nuk ka mamograf.
Drejtori i Klinikë së Onkologjisë, Ilir Kurtishi, tha se për 9 muaj në këtë klinikë janë kryer 200 mijë shërbime mjekësore, duke shtuar se është rritur edhe numri i femrave që është bërë diagnostikimi në stadin e parë të sëmundjes.