Gjermani, qeni i shtëpisë mbyt nënën shqiptare dhe djalin e saj

2018-04-05 në ora 07:16

Për shtatë vite e mbajtën në shtëpi, por qeni për një moment u kthye në vrasës të pronarëve të tij. Kjo tragjedi ka ndodhur në Gjermani, kur kafsha e racës Staffordshire-Terrier me emrin “Chico” mbyti nënën shqiptare nga Kosova Lazime K. (52 vjeçare) dhe djalin e saj 27 vjeçar në një banesë në Hannover.

Bild.de ka raportuar se të martën në mbrëmje, e bija e Lezimes, 25 vjeçare, po merakosej pasi që nuk mund t’i merrte në telefon nënën dhe vëllanë, transmeton Albinfo.ch.

Vajza kishte shkuar te banesa dhe ajo që pa nga dritarja ishte e tmerrshme: vëllai i saj i vdekur, i shtrirë në dysheme. Ajo alarmoi shpejt policinë dhe kur policët erdhën, 25 vjeçarja i paralajmëroi të kishin kujdes nga qeni. Policët me pajisje speciale e neutralizuan qenin dhe e futën në kafaz.

Policia ka deklaruar se në bazë të hetimeve të deritanishme, përfundimi është se qeni ka shkaktuar vdekjen e të dy viktimave, por është ende e paqartë se si ka ndodhur.

Qentë e racës Staffordshire Terrier konsiderohen si jashtëzakonisht të fuqishëm, luftarakë dhe të patrembur. Fqinjët e kanë dëgjuar shpeshherë këtë qen duke lehur dhe e konsideronin si agresiv, përcjell Albinfo.ch. Ata mendojnë se gruaja e hendikepuar dhe i biri i saj shtatanik (me trup të pazhvilluar) ishin të mbingarkuar me përkujdesjen për qenin.

Para dy vitesh një inspektor për mbrojtjen e kafshëve i kishte vizituar pasi që ishte njoftuar se qeni qëndronte në ballkon dhe nuk dilte pothuaj fare.

Prokuroria ka urdhëruar bërjen e obduksionit të dy viktimave për të gjetur shkaktarin e vdekjes së tyre.

Autoritetet pastaj do të vendosin nëse do të mbytet qeni ose jo. Deri atëherë ai do të mbahet në një strehimore kafshësh.