Sa herë që ka organizuar kurse me OJQ-në e tij, drejtori i Radiologjisë në QKUK Dr. Bujar Gjikolli e ka marr miratimin për ligjërata edhe nga profesori Selami Sylejmani. Por pasi ka marr akreditimin dhe ka ftuar pjesëmarrësit nën marketingun me emrin e Sylejmanit, Gjikolli nuk e ka ftuar asnjëherë atë për të mbajtur ligjëratat.
Janë të paktën tre kurse të organizuara nga OJQ KOMC e cila udhëhiqet nga Gjikolli, ku figuron emri i profesorit Selami Sylejmani. Këto kurse, të quajtura shkollë, janë organizuar për abdomen dhe pelvik në vitin 2017, 2018 dhe 2019. Por në asnjërën prej tyre nuk është ftuar Prof. Sylejmani që të mbante ligjëratat siç ishin dakorduar me Gjikollin. Madje me emrin e tij akreditoi edhe kurset e fundit në Odën e Mjekëve të Kosovës, shkruan Gazeta Shneta.
Profesor Sylejmani thotë të mos jetë fare në dijeni nëse janë mbajtur këto kurse. Ai pohon se është thirrur nga Gjikolli për t’ia marr konfirmimin për të ligjëruar në këto kurse por deklaron se nuk është ftuar asnjëherë për t’i mbajtur ato ligjërata. Madje ai supozon se këto kurse nuk janë mbajtur fare, por e vërteta është se kurset kanë vazhduar të mbahen ndërsa ai nuk është ftuar
“Sigurisht nuk është mbajtur shkolla sepse nëse do të mbahej ai do të duhej të më ftonte për të mbajtur ligjërata. Unë nuk kam mbajtur asnjëherë asnjë ligjëratë në këtë shkollë”, ka deklaruar Sylejmani.
Në këto kurse kanë ligjëruar disa mjekë të tjerë. Pjesëmarrja për të interesuarit kushton rreth 1 mijë euro. Gazeta ka raportuar më parë se këto para derdhen në llogarinë e një kompanie në emër të bashkëshortes së Gjikollit.
Dr. Bujar Gjikolli nga viti i kaluar mban pozitën e drejtorit të Radiologjisë në QKUK. Por kjo nuk e ka ndaluar që të vazhdojë me biznesin e tij me kurse të ultratingullit, vetëm se kësaj here e ka përdorur emrin e bashkëshortes. /Gazeta Shneta/