Oda e Mjekëve të Kosovës kishte alarmuar Inspektoratin Shëndetësor dhe Ministrinë e Shëndetësisë më 7 janar për ardhjen e Dr. Klementina Kuzeska, specialiste e gjinekologjisë në Spitalin “Acibadem Sistina” në Shkup.
Kuzeska erdhi më 13 janar në Prishtinë për të ofruar konsulta falas për frytnim të asistuar mjekësor për pacientët kosovar, shkruan Gazeta Shneta.
Por asaj iu ndalua ky shërbim nga Inspektorati Shëndetësor, pasi nuk kishte licencë nga Ministria e Shëndetësisë së Republikës së Kosovës si profesioniste e huaj.
Por Kuzeska po del se nuk ka aplikuar as për anëtarësim në Odën e Mjekëve, gjë që sipas ligjeve të Kosovës do të duhej ta bënte për të ushtruar veprimtarinë e saj si profesioniste.
Këtë e ka konfirmuar për Gazetën Shneta, kryetari i OMK-së Dr. Pleurat Sejdiu. “Mund t’ju konfirmoj se doktoresha në fjalë nuk është anëtare e Odës së Mjekëve të Kosovës”, ka deklaruar Sejdiu.
Veprimtaria e jashtëligjshme e specialistes së spitalit maqedonas në Prishtinë ka bërë që dhjetëra pacientë të anulojnë terminet që kishin rezervuar.
Ndalimi i këtij shërbimi ka ardhur pas hulumtimit të Gazetës Shneta që rezultoi se Kuzeska nuk kishte aplikuar për licencë në MSH. /Gazeta Shneta/