Vetëm disa orë aktivitet fizik në javë mund të ofrojnë mbrojtje të rëndësishme për shëndetin e zemrës. Megjithatë, një studim i ri tregon se burrat duhet të ushtrohen dukshëm më shumë se gratë për të arritur të njëjtat përfitime kardiovaskulare.
Studimi është publikuar në revistën “Nature Cardiovascular Research”, shkruan burimi Euronews Health.
Sipas të dhënave të studimit, gratë që ushtrohen rreth katër orë në javë arrijnë të ulin rrezikun e sëmundjes koronare të zemrës me rreth 30 për qind.
Në të kundërt, burrat duhet të kryejnë afërsisht nëntë orë aktivitet fizik në javë për të arritur të njëjtin nivel mbrojtjeje.
Sëmundja koronare e zemrës shkaktohet nga ngushtimi ose kalcifikimi i enëve të gjakut, gjë që kufizon furnizimin e zemrës me oksigjen dhe rrit rrezikun për komplikime serioze kardiovaskulare, transmeton Gazeta Shneta.
Edhe nivelet më të ulëta të aktivitetit fizik rezultuan të dobishme për të dy gjinitë.
Rreth 2.5 orë ushtrime të moderuara deri intensive në javë e ulin rrezikun e sëmundjes koronare me 22 për qind tek gratë dhe 17 për qind tek burrat. Këto gjetje u komentuan edhe nga ish-ministri gjerman i shëndetësisë, Karl Lauterbach, i cili e quajti këtë diferencë “të padrejtë” në platformën X.
Studimi thekson gjithashtu se edhe personat që tashmë vuajnë nga sëmundjet e zemrës përfitojnë ndjeshëm nga aktiviteti fizik.
Gratë që ushtrohen vetëm 51 minuta në javë kanë rrezik më të ulët vdekjeje, ndërsa burrave u nevojiten rreth 85 minuta për të arritur të njëjtën mbrojtje. Kjo tregon se burrat duhet të ushtrohen rreth 1.7 herë më shumë për të përfituar në të njëjtën masë.
Sipas ekspertëve, këto dallime mund të shpjegohen nga faktorë biologjikë. Hormoni estrogjen dhe struktura muskulore më e orientuar drejt qëndrueshmërisë u japin grave një avantazh natyror, ndërsa muskujt e burrave janë më të përshtatur për forcë dhe shpejtësi, duke kërkuar më shumë stërvitje për të forcuar zemrën. /Gazeta Shneta/