U.d. drejtoresha e përgjithshme e ShSKUK-së, Dr. Narqize Arënliu-Hoxhaj, ka vizituar sot Klinikën e Psikiatrisë.
Shërbimi Spitalor Universitar i Kosovës (ShSKUK), ka njoftuar se u.d. drejtoresha e përgjithshme e këtij institucioni, ka zhvilluar një vizitë në Klinikën e Psikiatrisë, në të cilën së fundmi është bërë riorganizimi i reparteve dhe shtimi i kapaciteteve me shtretër, përcjell Gazeta Shneta.
Drejtori i kësaj klinike, Faton Kutllovci, e ka njoftuar drejtoreshën Arënliu-Hoxhaj, se në kuadër të riorganizimit, është hapur Reparti i ri i sëmundjeve të varësisë, me ç’rast është dyfishuar numri i shtretërve, nga gjashtë në 12 shtretër.
Kutllovci ka thënë se në kuadër të ish-Repartit të sëmundjeve të varësisë, sot është hapur Reparti i ri, që nuk ka ekzistuar më parë, Reparti i çrregullimeve akute-psikotike, i cili do të ketë gjashtë shtretër.
Arënliu-Hoxhaj, ka përgëzuar stafin e klinikës për këtë riorganizim dhe hapjen e shërbimeve të reja, duke ofruar mbështetjen dhe përkrahjen e ShSKUK-së për zgjerim dhe avancim të mëtejmë të shërbimeve në Klinikën e Psikiatrisë. /Gazeta Shneta/