“Shërbimet emergjente janë kurriz i gjithë shëndetësisë. Kosova ka ende nevojë për ofrimin e mbështetjes nga jashtë”, tha Kryeministri Haradinaj në një takim të mbajtur me një delegacion mjekësh nga Turqia, të kryesuar nga Esen Uysal, Kordinatore e Qendrës Ndërkombëtare të Trajtimit të Emergjencave dhe Fatkeqësive në Izmir të Turqisë.
Temë diskutimi e këtij takimi ishin bashkëpunimi në fushën e mjekësisë, avancimi i shërbimeve të vendit në dhënien e ndihmës së parë dhe trajnimi i stafit mjekësor në disa fusha specifike, njofton Ekonomia Online.
Kryeministri Haradinaj falënderoi Esen për kontributin e dhënë në përmirësimin e shërbimeve shëndetësore në vend, falë asistencës dhe trajnimeve të organizuara deri tash.
Projekti për shërbimet emergjente në tërë vendin, deri tani ka mbështetur trajnimin dhe edukimin e 120 mjekëve nga gjithë vendi si dhe trajtimin dhe shërimin e mbi 100 pacientëve.
Pjesë e takimit ishte edhe Dr. Basri Lenjani, specialist i mjekësisë emergjente dhe u.d i Drejtorit të Klinikës Emergjente.