Kryeministri i Kosovës Avdullah Hoti ka vizituar sot Shërbimin Spitalor Klinik Universitar, ku është pritur nga drejtori Valbon Krasniqi dhe ka mbajtur një takim me drejtorët e klinikave të QKUK-së.
Hoti ka përgëzuar stafin shëndetësor për punën që kanë bërë për menaxhimin e pandemisë. Ai ka thënë se janë duke punuar që vjeshta Kosovën ta gjejë më të përgatitur sa i përket valës së dytë.
Në anën tjetër Zemaj ka thënë se do të kërkojnë organizim shtesë për avancimin e shërbimeve shëndetësore.
“Jemi në një fazë kur na është dhënë mundësia që bashkërisht të marrim pak frymë më lirshëm, në këtë kohë do të kërkojmë organizim shtesë, do të ngrisim interferimin e përbashkët sipas detyrave dhe ligjeve në fuqi, për avancimin e shërbimeve shëndetësore”, tha Zemaj.
Ushtruesi i detyrës së drejtorit të SHSKUK-së, Valbon Krasniqi, në një konferencë me kryeministrin Avdullah Hoti dhe ministrin e Shëndetësisë, Armend Zemaj, ka thënë se kanë plane konkrete për ecjen më tutje në menaxhimin e pandemisë, por edhe të sistemit shëndetësor në përgjithësi.
Krasniqi tha se pandemia i ka vënë në pah nevojat e sistemit shëndetësor në Kosovë, ndërsa ka theksuar se kanë plane konkrete për ta përballuar edhe valën e dytë të pandemisë, duke e përmendur dimrin si periudhën kur mund të fillojë kjo valë.
“Ne tani kemi plane konkrete për ecjen më tutje. Kemi plane për përgatitje më të mira për ta përballuar pandeminë. Siç e dini, ministri i Shëndetësisë, edhe me përkrahjen e juaj ka marrë vendim që ndërtesa e Klinikës Emergjente të destinohet për trajtimin e rasteve klinike me COVID në dimër nëse na paraqitet një valë e tillë. Po ashtu, tash ne kemi përvojën e organizimit të të gjitha spitaleve dhe klinikave tjera në menaxhimin e këtyre rasteve”, ka thënë Krasniqi.
Ai ka paralajmëruar edhe shtimin e shërbimeve të reja shëndetësore në vend. /Gazeta Shneta/