Sekretari i Përgjithshëm i Bashkësisë Islame, hoxhë Ahmet Sadriu, ka deklaruar se dhurimi vullnetar i gjakut nuk e prish agjërimin gjatë muajit të shenjtë të Ramazanit.
Sadriu në një deklaratë për Gazetën Shneta, ka thënë se pas dhënies së gjakut agjëruesi nuk duhet të konsumojë lëngje ose ushqime tjera deri në kohën e iftarit.
“Dhurimi gjakut nuk e prish agjërimin, por pas dhënjes së gjakut nuk duhet pirë ose ngrënë ndoj send siç e praktikojnë dhuruesit e gjakut duke pirë lëngje. Kur të vjen iftari bën iftar e jo para iftarit”, ka deklaruar Sadriu.
Gazeta ka raportuar më herët për nevojën urgjente për dhurimin e gjakut në Qendrën Kombëtare të Transfuzionit të Gjakut. Drejtoresha Dr. Bukurije Zhubi ka deklaruar se janë në përfundim të rezervave dhe kanë nevojë emergjente për gjak.
Ajo ka deklaruar se stafi mjekësor janë të gatshëm të organizojnë dhurimin e gjakut pas iftarit në Qendrën e Transfuzionit nëse ka grupe të interesuara. Ndryshe Zhubi ka thënë se koha më e mirë e dhurimit të gjakut do të ishte pas orës 8:00 të mëngjesit për shkak se gjaku ka më pak yndyrë nga ushqimet. /Gazeta Shneta/
Transfuzioni thirrje urgjente për dhurim të gjakut: Jemi në rezervat e fundit, shpëtoni jetë