Qendra Kombëtare e Kosovës për Transfuzion të Gjakut është duke bërë thirrje urgjente për dhurim vullnetar të gjakut pasi është në rezervat e fundit.
“Kërkesë Urgjente! Në këtë kohë pandemie ndihet mungesa e gjakut si kurrë më parë, për shkak të kërkesave të vazhdueshme dhe numrit të pamjaftueshëm me dozat e gjakut. Ju lutemi, për hirë të të sëmurëve që kanë nevojë për gjak të vini të dhuroni gjak në QKKTGJ”, thuhet në thirrjen publike të Transfuzionit, shkruan Gazeta Shneta.
Kjo qendër ka bërë të ditur se aktualisht janë në rezervat e fundit dhe kjo gjendje është kritike. Këtë e ka konfirmuar edhe vet drejtoresha e Qendrës Dr. Bukurije Zhubi.
“Është e vërtet se jemi në gjendje kritike sa i përket stokut të gjakut. Kjo ka ndodhur për shkak të pandemisë, por tani edhe për shkak të muajit të Ramazanit. Ne ju bëjmë thirrje të gjithë atyre që duan të dhurojnë gjak ta bëjnë këtë sa më parë sepse kemi mungesë emergjente”, ka deklaruar Zhubi.
Ajo ka thënë se Instituti Kombëtar i Shëndetit Publik i ka rekomanduar që të mos organizojnë dhurim vullnetar të gjakut në hapësira tjera përveç në ndërtesën e Transfuzionit ku janë ndërmarr të gjitha masat mbrojtëse sipas rekomandimeve. Qytetarët që duan të dhurojnë gjak mund të bëjnë termin përmes faqes zyrtare në Facebook.
Me që jemi në muajin e Ramazanit, Zhubi ka deklaruar se stafi i Qendrës është i gatshëm të organizojë dhurimin e gjakut edhe pas iftarit. Por dhurimi i gjakut nuk preferohet pas ngrënies së ushqimit për shkak të përmbajtjes së yndyrës. Zhubi ka deklaruar se nëse është e mundur dhurimi i gjakut do të ishte më së miri të bëhej në periudhën nga ora 8 e mëngjesit, kohë kjo pas ngrënies së ushqimit në syfyr. /Gazeta Shneta/