Bari semaglutid, një ilaç GLP-1 i përdorur për të trajtuar diabetin e tipit 2 dhe për humbjen në peshë te të rriturit obezë apo mbipeshë, ka treguar përfitime të rëndësishme kardiovaskulare. Këto përfitime janë prezantuar në Kongresin Evropian për Obezitetin në Venecia, bazuar në të dhënat e dy studimeve të publikuara në Nature Medicine.
Studimi “Select” filloi në vitin 2018 dhe përfshiu 17,604 pjesëmarrës nga 41 vende të ndryshme. Në vitin 2023, studimi evidentoi se të rriturit mbipeshë apo obezë, të cilët nuk vuajnë nga diabeti dhe që morën semaglutid për më shumë se 3 vjet, shfaqnin 20% më pak rrezik për infarkt, iktus apo vdekje për shkak të sëmundjeve kardiovaskulare dhe humbën mesatarisht 9.4% të peshës trupore, shkruan Nature, transmeton Gazeta Shneta.
Rezultatet e studimeve tregojnë se trajtimi me semaglutid ka sjellë përfitime kardiovaskulare të pavarura nga pesha fillestare dhe sasia e peshës së humbur. Kjo sugjeron se pacientët me nivele të lehta të obezitetit apo ata që humbën pak peshë gjithashtu mund të përfitojnë nga ky trajtim.
Semaglutidi mund të ndikojë pozitivisht në glicemi, presionin e gjakut, inflamacion, si dhe të ketë efekte të drejtpërdrejta në muskulin kardiak dhe enët e gjakut. Këto mekanizma ndihmojnë në reduktimin e rrezikut kardiovaskular, pavarësisht sasisë së peshës së humbur.
Autorët theksojnë se “Select” nuk është një studim parandalimi parësor dhe të dhënat nuk mund të referohen për të gjithë të rriturit mbipeshë dhe obezë për parandalimin e efekteve anësore kardiovaskulare./Gazeta Shneta/