Një studim i ri nga Universiteti i Essex në Mbretërinë e Bashkuar ka hedhur dritë mbi rolin e gjenetikës në humbjen e peshës, duke zbuluar se personat me një kombinim të veçantë prej 14 gjeneve arrijnë të humbin peshë më shpejt.
Sipas rezultateve, individët që kanë këtë kombinim gjenesh mund të humbasin dyfishin e peshës krahasuar me ata pa të njëjtin profil gjenetik, edhe kur ndjekin të njëjtin regjim ushtrimor, shkruan CNN, transmeton Gazeta Shneta.
Studimi përfshiu një periudhë tetëjavore, gjatë së cilës u vu re se grupi me kombinimin gjenetik të favorizuar humbi mesatarisht 5 kilogramë, ndërsa grupi tjetër humbi vetëm 2 kilogramë. Nga këto 14 gene, njëri luan rol kryesor, duke kontribuar në 62% të ndikimit në humbjen e peshës.
Ekspertët e përfshirë shpjegojnë se, ndonëse gjenetika mund të japë përparësi, një stil i shëndetshëm jetese dhe ushtrimet fizike mbeten vendimtare për arritjen e rezultateve optimale. Përmirësimi i shëndetit mund të bëhet më i personalizuar në të ardhmen duke u bazuar në profilin gjenetik të individëve, duke rritur efektivitetin e ndërhyrjeve shëndetësore për humbjen e peshës dhe shëndetin në përgjithësi.