Një studim i ri në “Diabetes, Obesity and Metabolism”, sugjeron se shumë njerëz arrijnë të ruajnë humbjen e peshës edhe pasi ndërpresin barnat GLP-1. Këto medikamente, të përdorura për trajtimin e obezitetit dhe diabetit të tipit 2, imitojnë hormonin GLP-1, duke rregulluar sheqerin në gjak, ngadalësuar zbrazjen e stomakut dhe ulur oreksin.
Studimi ndoqi 7,938 të rritur që përdorën semaglutid ose tirzepatid midis viteve 2021–2023 dhe i ndërprenë ato pas 3–12 muajsh. Para ndërprerjes, pacientët me obezitet humbën mesatarisht 8.4% të peshës trupore, ndërsa ata me diabet të tipit 2 rreth 4.4%, shkruan burimi Medical News Today transmeton Gazeta Shneta.
Pas një viti pa trajtim, rikthimi i peshës ishte i vogël. Grupi me obezitet rifitoi vetëm 0.5%, ndërsa grupi me diabet humbi edhe 1.3% të peshës mesatarisht.
Megjithatë, rezultatet individuale ndryshonin: 45% e pacientëve me obezitet dhe 56% e atyre me diabet ruajtën ose vazhduan të humbnin peshë.
Këto gjetje bien disi në kundërshtim me studimet klinike të mëparshme, të cilat sugjeronin rikthim të shpejtë të peshës pas ndërprerjes së trajtimit. Një shpjegim i mundshëm është se shumë pacientë vazhduan me metoda të tjera menaxhimi, si ndryshime në stilin e jetesës ose trajtime alternative.
Sipas studiuesve nga Klinika Kleveland, faktorët kryesorë për ndërprerjen e barnave janë kostot dhe efektet anësore.
Ata theksojnë rëndësinë e kuptimit të strategjive që pacientët ndjekin pas ndërprerjes, pasi në praktikën reale rezultatet mund të jenë më pozitive sesa në kushtet e kontrolluara të studimeve.
Në përfundim, megjithëse kërkohen studime të mëtejshme, duket se një pjesë e konsiderueshme e pacientëve mund të ruajë përfitimet e humbjes së peshës edhe pas ndërprerjes së barnave GLP-1. /Gazeta Shneta/