I është dhënë lamtumira sot profesorit të mjekësisë Dr. Adem Limanit, i cili ndërroi jetë të hënën. Kolegët e tij e kanë vlerësuar lart moralisht e profesionalisht të ndjerin.
Shoqata e kirurgëve të ORL-së, të cilën i ndjeri e ka udhëhequr, e kanë konsideruar Limanin si pjesë të elitës së mjekëve shqiptarë. “Ai punoi me përkushtim sidomos në kirurgjinë e qafës dhe onkologji, por edhe në fushat tjera. Ishte kryetar i Shoqatës së ORL-së të Kosovës derisa u nda nga jeta. Me aftësinë, finesën, maturinë dhe kulturën e tij hyn në elitën e mjekëve shqiptar. Do të mbetet i paharruar kujtimi i tij”, thuhet në ngushëllimin e Shoqatës, transmeton Gazeta Shneta.
Të ndjerin e ka përkujtuar edhe kryetari i Komunës së Gjilanit, Lutfi Haziri. Ai ka thënë se kontributi i tij i jashtëzakonshëm në mjekësi do të kujtohet përjetë.
“Prof. Dr. Adem Limani nuk është më në mesin tonë, por do ta kujtojmë përgjithmonë si humanist të madh dhe njeriun i cili dha kontribut të jashtëzakonshëm në mjekësi. Përpos që mjekoi mijëra pacientë, profesor Limani do të mbahen në mend për kontributin e tij të madh në nxjerrjen e kuadrove më të mira të doktorëve të rinjë, të cilët sot janë specialistë të shumë fushave. Ngushëllimet më të sinqerta familjes, shokëve, kolegëve miqve e farefisit”, thuhet, ndër të tjera në telegramin e ngushëllimit të kryetarit Haziri.
Deputeti i LDK-së, neurokirurgu Haxhi Avdyli, e ka cilësuar si humbje të madhe për komunitetin e mjekësisë, vdekjen e Limanit. “Kosova e Komuniteti i mjekësisë paska humbur doajenin , profesorin e nderuar , mësimdhënësin e shumë gjeneratave , ekspertin e ORL-së dhe kolegun tonë të palodhur, prof Dr Adem Limanin . Humbje e madhe për ne, mungesa e tij do ndjehet . Pusho i qetë profesor dhe krenar për jetën dhe kontributin që dhe”, ka shkruar Avdyli. /Gazeta Shneta/