Një grua është gjobitur me 300 euro në Prizren pasi i kishte lënë fëmijët e saj të mbyllur në një veturë të parkuar gjatë temperaturave të larta.
Sipas Policisë, rasti ka ndodhur më 27 qershor, rreth orës 17:50, në parkingun e një qendre tregtare në Prizren, ku është raportuar se disa fëmijë ndodheshin të mbyllur brenda një automjeti.
Menjëherë pas pranimit të informacionit, njësitet policore kanë dalë në vendin e ngjarjes dhe, me ndihmën e një shufre metalike, kanë hapur veturën për t’i nxjerrë fëmijët.
Sipas policisë, fëmijët ishin të rraskapitur dhe të dehidratuar si pasojë e temperaturave të larta. Pak më vonë në vendngjarje ka mbërritur edhe e ëma e tyre.
Për shkak të moskujdesit ndaj fëmijëve, policia i ka shqiptuar asaj një gjobë prej 300 eurosh për kundërvajtjen “Moskujdes ndaj të miturit”.
Policia ka apeluar te qytetarët që gjatë ditëve me temperatura të larta të tregojnë kujdes të shtuar, veçanërisht ndaj fëmijëve, të moshuarve dhe personave me probleme shëndetësore.
“Në asnjë rast nuk duhet të lihen fëmijët të mbyllur në automjet, pasi pasojat mund të jenë fatale”, thuhet në apelin e Policisë.