Programi i Skriningut Neonatal në Klinikën e Neonatologjisë në QKUK ka identifikuar deri më tani tre raste të konfirmuara me sëmundje të lindura, përkatësisht dy foshnja të diagnostikuara me fibrozë cistike dhe një me fenilketonuri.
Sipas njoftimit të Klinikës së Neonatologjisë, programi ka nisur më 9 tetor të vitit të kaluar si projekt i Ministrisë së Shëndetësisë, me mbështetjen e Shërbimit Spitalor dhe Klinik Universitar të Kosovës (ShSKUK) dhe QKUK-së, përcjell Gazeta Shneta.
Që nga fillimi i zbatimit të programit janë kryer rreth 4,146 testime te të porsalindurit. Përveç tre rasteve të konfirmuara pozitive, janë identifikuar edhe 16 raste të dyshimta, të cilat janë nën mbikëqyrje.
Skriningu neonatal është një test i thjeshtë, i sigurt dhe i shpejtë që mundëson zbulimin e hershëm të sëmundjeve metabolike dhe gjenetike, të cilat zakonisht nuk shfaqin simptoma në ditët e para të jetës. Diagnostikimi i hershëm u jep mundësi foshnjave të marrin trajtim në kohë, duke parandaluar komplikime të rënda dhe duke përmirësuar cilësinë e jetës.
Pas fillimit të zbatimit në QKUK, programi është zgjeruar edhe në spitalet rajonale në Mitrovicë, Gjakovë, Gjilan, Prizren dhe Pejë. Sipas Klinikës së Neonatologjisë, së shpejti skriningu neonatal do të nisë edhe në Ferizaj dhe Vushtrri, me synimin që çdo i porsalindur në Kosovë të ketë qasje në këtë shërbim të rëndësishëm./Gazeta Shneta/