Instituti Kombëtar i Shëndetit Publik ka paralajmëruar përkeqësim të situatës me Covid-19 në ditët në vazhdim.
Përmes një komunikate për media, IKSHPK ka deklaruar se me rritjen e numrit të rasteve pozitive në ditët e fundit dhe me shfaqjen e variantit Omicron në Kosovë, situata epidemiologjike mund të përkeqësohet, shkruan Gazeta Shneta.
“Situata epidemiologjike mund të përkeqësohet edhe më shumë ditët në vazhdim, andaj IKSHPK apelon tek të gjithë qytetarët që të respektohen masat e Qeverisë së Republikës së Kosovës. Për shkak të rrezikshmërisë së lartë të përhapjes së COVID-19, bëjmë thirrje në veçanti për kujdes dhe mosgrumbullim. Ndërsa, rekomandojmë institucionet përgjegjëse të mbikëqyrin me përpikëri dhe të ndërmarrin të gjitha veprimet e nevojshme për zbatimin e masave për parandalimin dhe luftimin e pandemisë”, kanë deklaruar nga IKSHPK.
Për të ulur rrezikun nga Covid-19, Instituti ka bërë thirrje qytetarëve që të vaksinohen.
“Duke qenë se vaksinimi është mënyra më e mirë dhe më e sigurt për të parandaluar COVID-19, veçanërisht format e rënda të sëmundjes dhe vdekjet, ne vazhdojmë të apelojmë fuqishëm për vaksinim sa më gjithpërfshirës, sa më të gjerë dhe sa më të shpejtë të popullatës nga mosha 12 vjeçare”, thuhet në deklaratën e IKSHPK-së. /Gazeta Shneta/