Një studim i fundit në Mbretërinë e Bashkuar ka shqyrtuar ndikimin e ilaçeve GLP-1 te personat me obezitet dhe astmë.
Studiuesit zbuluan se përdoruesit e këtyre ilaçeve kishin kontroll më të mirë të astmës, megjithëse nuk u vu re ndonjë ndryshim në funksionin e mushkërive krahasuar me ata që nuk i merrnin ilaçet GLP-1, shkruan burimi Medical News Today transmeton Gazeta Shneta.
Këto medikamente – si semaglutidi (Ozempic, Wegovy) dhe liraglutidi (Victoza, Saxenda) – zakonisht përshkruhen për diabetin e tipit 2 dhe për humbje peshe.
Por me rritjen e përdorimit të tyre, studiuesit po shqyrtojnë edhe përfitime të tjera, si ndikimi në reduktimin e rrezikut nga disa kancere të lidhura me obezitetin dhe ulja e rrezikut për dementi.
Studiues nga Universiteti i Aberdeen dhe Observational and Pragmatic Research Institute analizuan të dhënat e rreth 60,000 personave, përfshirë mbi 10,000 që kishin njëkohësisht obezitet dhe astmë dhe përdornin ilaçe GLP-1, dhe rreth 50,000 pjesëmarrës të tjerë me karakteristika të ngjashme, por që nuk i kishin marrë këto ilaçe.
Të gjithë pjesëmarrësit kishin pasur një vizitë për astmë brenda 12 muajve para fillimit të trajtimit me GLP-1 dhe kishin indeks të masës trupore (BMI) mbi 30.
Çdo pjesëmarrës i grupit GLP-1 u krahasua me pesë persona të ngjashëm që nuk i kishin përdorur këto ilaçe.
Studiuesit besojnë se efektet anti-inflamatore të ilaçeve GLP-1 mund të jenë të dobishme për mushkëritë, duke ndikuar në përmirësimin e kontrollit të astmës tek personat me obezitet.
Rezultatet u botuan në revistën “Advances in Therapy”. /Gazeta Shneta/