Një studim i fundit i realizuar në Mbretërinë e Bashkuar ka analizuar ndikimin e ilaçeve GLP-1 te personat që vuajnë njëkohësisht nga obeziteti dhe astma.
Sipas gjetjeve, përdoruesit e këtyre medikamenteve kishin kontroll më të mirë të astmës. Megjithatë, nuk u vërejt ndonjë përmirësim i dukshëm në funksionin e mushkërive krahasuar me personat që nuk i përdornin ilaçet GLP-1, shkruan Medical News Today përcjell Gazeta Shneta.
Këto ilaçe – si semaglutidi (Ozempic, Wegovy) dhe liraglutidi (Victoza, Saxenda) – përdoren zakonisht për trajtimin e diabetit të tipit 2 dhe për humbje peshe. Me rritjen e përdorimit të tyre, studiuesit po shqyrtojnë edhe përfitime të tjera të mundshme, përfshirë uljen e rrezikut nga disa lloje kanceri të lidhura me obezitetin dhe ndikimin në reduktimin e rrezikut për demencë.
Studiues nga “Universiteti Aberdeen”, dhe “Observational and Pragmatic Research Institute”, analizuan të dhënat e rreth 60,000 personave. Në studim u përfshinë mbi 10,000 individë me obezitet dhe astmë që përdornin ilaçe GLP-1, si dhe rreth 50,000 pjesëmarrës të tjerë me karakteristika të ngjashme që nuk i kishin përdorur këto medikamente.
Të gjithë pjesëmarrësit kishin pasur të paktën një vizitë për astmë brenda 12 muajve para fillimit të trajtimit me GLP-1 dhe kishin indeks të masës trupore (BMI) mbi 30. Çdo pjesëmarrës në grupin që përdorte GLP-1 u krahasua me pesë persona të ngjashëm që nuk i kishin përdorur këto ilaçe.
Sipas studiuesve, efektet anti-inflamatore të ilaçeve GLP-1 mund të luajnë rol në përmirësimin e kontrollit të astmës, veçanërisht tek personat me obezitet.
Rezultatet e studimit janë publikuar në revistën “Advances in Therapy”. /Gazeta Shneta/