Ilaçet e zakonshme kardiovaskulare janë të lidhura me një rrezik më të ulët të demencës tek të moshuarit, sipas një studimi të ri nga Instituti Karolinska, i botuar në revistën “Alzheimer’s & Dementia”.
Sëmundjet kardiovaskulare dhe demenca janë sfida kryesore të shëndetit publik që shkaktojnë një barrë të konsiderueshme si për kujdesin shëndetësor ashtu edhe për shoqërinë. Një studim i ri nga Instituti Karolinska në Suedi tregon se përdorimi afatgjatë i barnave të zakonshme kardiovaskulare shoqërohet me rrezik më të ulët të demencës më vonë në jetë, shkruan burimi Medical Xpress përcjell Gazeta Shneta.
“Ne mund të shohim një lidhje të qartë midis përdorimit afatgjatë – pesë vjet ose më shumë – të këtyre barnave dhe zvogëlimit të rrezikut të demencës në moshë më të shtyer,” thotë Mozhu Ding, profesor asistent në Institutin e Mjekësisë Mjedisore të Instituti Karolinska dhe një nga autorët kryesor të punimit.
Studiuesit përdorën regjistrat kombëtarë suedezë. Rreth 88,000 njerëz mbi moshën 70-vjeç, të cilët u diagnostikuan me demencë midis 2011 dhe 2016 u përfshinë në studim, si dhe 880,000 të tjerë, si grup kontrolli. Informacioni mbi barnat kardiovaskulare është marrë nga Regjistri Suedez i Barnave me Recetë.
Rezultatet tregojnë se përdorimi afatgjatë i barnave antihipertensive, ilaçeve për uljen e kolesterolit, diuretikëve dhe ilaçeve për hollimin e gjakut shoqërohet me 4% deri në 25% rrezik më të ulët të demencës. Kombinimet e barnave kishin efekte më të forta mbrojtëse sesa nëse do të përdoreshin vetëm.
“Studimet e mëparshme janë fokusuar në barna individuale dhe grupe të veçanta pacientësh, por në këtë studim, ne kemi një qasje më të gjerë,” thotë Alexandra Wennberg, studiuese e lidhur në Institutin e Mjekësisë Mjedisore dhe autorja tjetër kryesore e punimit. /Gazeta Shneta/