Një hulumtim klinik i ri, që zgjati 68 javë, ka treguar se një ilaç i ri për humbje peshe i zhvilluar nga kompania farmaceutike “Novo Nordisk”, i quajtur ‘CagriSema’, është më efektiv sesa semaglutidi (Wegovy).
Sipas rezultateve, injeksionet javore me CagriSema çuan në humbje peshe deri në 14.2%, krahasuar me 10.2% te personat që përdorën vetëm semaglutid, shkruan burimi Medical News Today transmeton Gazeta Shneta.
Përveç humbjes në peshë, CagriSema tregoi edhe përmirësim më të madh në kontrollin e sheqerit në gjak. Ulja mesatare e HbA1C ishte 1.91 pikë përqindjeje, ndërsa te semaglutidi ishte 1.76.
HbA1C është një tregues i nivelit mesatar të sheqerit në gjak gjatë 2–3 muajve të fundit.
CagriSema është një kombinim me dozë fikse i dy barnave: semaglutidit, një agonist i receptorit GLP-1, dhe cagrilintidit, një agonist i receptorit të amilinës. Këto hormone ndikojnë në uljen e oreksit, ngadalësimin e zbrazjes së stomakut, rregullimin e insulinës dhe uljen e glukagonit, duke ndihmuar në kontrollin e peshës dhe glikemisë.
Studimi, përfshiu 2,728 persona me diabet të tipit 2, të cilët nuk e kishin të kontrolluar mirë sëmundjen vetëm me metforminë.
Rezultatet treguan se kombinimi i dy barnave jep përfitime më të mëdha sesa secili prej tyre veçmas.
Ekspertët theksojnë se, ndonëse rezultatet janë premtuese, ato janë ende paraprake dhe të publikuara nga vetë prodhuesi.
Nevojiten studime të pavarura për të vlerësuar plotësisht efektivitetin dhe sigurinë afatgjate të këtij ilaçi të ri. /Gazeta Shneta/