Inatet personale në mes mjekëve mund ta rrënojnë Klinikën e Kardiokirurgjisë në QKUK.
Klinika e Kardiokirurgjisë në QKUK në dy vjetët e fundit është përballë me skandale, incidente, rrahje në mes kolegëve, dhe dyshime për keqpërdorim të fondeve për stimulime, shkruan Gazeta Shneta.
Për të zbutur inatet personale sidomos në mes të u.d. drejtorit Rifat Brahimaj dhe shefit të repartit Adem Grbollar janë bërë përpjekje nga u.d. drejtori i SHSKUK-së Valbon Krasniqi. Ai ka takuar disa herë stafin e klinikës dhe menaxhmentin, por deri më tani nuk ka pas rezultate.
Një përpjekje tjetër është bërë para disa ditësh edhe nga anesteziologu Lulzim Emini dhe oftalmologu Florim Zejnullahu me kërkesë të Krasniqit, por sërish nuk është gjetur zgjidhje.
Inatet në mes mjekëve kanë filluar në dy vjetët e fundit kur klinika udhëhiqej nga internisti Tefik Bekteshi. Në janar të vitit të kaluar ndodhi një incident kur Adem Grbollar ishte fjalosur me specializantin Endrit Shala në sallën e operacionit, derisa pacientja ishte e shtrirë në tavolinë në gjendje të rëndë.
Ndërkaq disa muaj më vonë ndodhi edhe një incident tjetër në mes të Rifat Brahimaj dhe Sabjan Memishajt. Pas kësaj ngjarje Brahimajt i ishte ndaluar hyrja në klinikë.
Në tetor 2020 u pezullua nga puna drejtori i klinikës Tefik Bekteshi nga Komisioni Disiplinor pas inicimit të procedurës nga Valbon Krasniqi. Ky i fundit e kishte iniciuar këtë procedurë pas parregullësive dhe dyshimeve për keqpërdorime financiare të evidentuara nga Auditori i Brendshëm.
Auditori kishte gjetur mjaft parregullsi me fondet për stimulime, të cilat ndaheshin vetëm për stafin e Kardiokirurgjisë me Kardiologji Invazive.
Pas pezullimit të Bekteshit, Brahimaj u emërua u.d. drejtor i klinikës i cili nuk u mirëprit nga një pjesë e kolegëve të tij. Të pakënaqurit me këtë vendim madje patën kërcënuar se do të ndërpresin punën nëse Bekteshi nuk rikthehet në krye të klinikës. Ky kërcënim mbeti vetëm në letër.
Për shkak të këtyre problemeve para një viti nga Kardiokirurgjia dhanë dorëheqje Dr. Raif Çavolli, i cili njihet si themelues i klinikës dhe Dr. Arbër Kutllovci. Të dy patën ofertë për t’u rikthyer në klinikë pas shpalljes së konkursit, por një gjë e tillë nuk ndodhi. /Gazeta Shneta/