Infarkti mund të ndodhë në çdo organ të trupit të njeriut, mirëpo forma më e zakonshme dhe më e rrezikshme është infarkti i zemrës, i njohur ndryshe edhe si sulm në zemër. Me infarkt nënkuptohet dëmtimi i indeve apo organeve si pasojë e ndërprerjes së furnizimit me gjak.
Dr. Vigan Mahmutaj, kardiolog në Qendrën Klinike Universitare të Kosovës (QKUK), thekson se faktorët kryesorë që çojnë në një sulm në zemër janë të shumtë dhe shpesh janë të lidhur me sëmundjet të tjera, shkruan Gazeta Shneta.
“Pacientët që kanë hipertension të zgjatur, çrregullime të yndyrës, janë diabetikë ose konsumojnë duhanin rregullisht, janë në rrezik më të lartë për sulm në zemër. Përveç këtyre, edhe faktorët socialë dhe ekonomikë si stresi mund të kontribuojnë. Këta janë faktorët që ndikojnë në zhvillimin e aterosklerozës në arteriet koronare, e cila më pas mund të çojë në infarkt,” shpjegon Dr. Mahmutaj.
Sipas kardiologut Dr.Mahmutaj, simptomat e një sulmi në zemër mund të jenë të ndryshme, por më e zakonshmja është dhimbja në gjoks.
“Shenja më tipike është një dhimbje shtypëse në kraharor, që zakonisht fillon në mes të gjoksit dhe mund të përhapet në anën e majtë, të djathtë ose drejt fytit, ka raste veçanërisht te pacientët diabetikë, ndodh edhe pa dhimbje fare. Shenjat shoqëruese përfshijnë djersitje, të vjella, marramendje, plogështi apo edhe humbje të vetëdijes” thekson ai.
Tutje Dr. Mahmutaj shprehet se në rastet e infarktit akut, procedura që përdoret për diagnostifikim dhe trajtim është koronarografia e cila shërben për të parë gjendjen e arterieve koronare.
“Koronarografia ka për qëllim të diagnostikojë dhe trajtojë bllokimet në arteriet e zemrës. Kjo procedurë bëhet veçanërisht në rastet e infarktit akut për të vlerësuar dhe hapur arteriet e bllokuara që shkaktojnë sulmin në zemër,” shton Dr. Mahmutaj.
Për më shumë ndiqni video: