Inspektorati Shëndetësor i Kosovës ka qenë nikoqir i Inspektoratit Shëndetësor të Shqipërisë për dy ditë radhazi në Prishtinë ku kanë kryer inspektime të përbashkëta.
Kjo është vizita kthyese nga ISHSH, pasi inspektorët kosovarë qëndruan në Shqipëri gjatë verës ku u njoftuan me masat dhe implementimin e tyre nga qeveria shqiptare për pandeminë, shkruan Gazeta Shneta.
ISHSH në Kosovë janë pritur nga krerë të Ministrisë së Shëndetësisë ku kanë biseduar për thellimin e bashkëpunimit për të kontribuar në zbatimin e masave anti-Covid-19 në dy vendet.
Delegacioni nga Shqipëria i kryesuar nga kryeinspektorja, Vjollca Braho është pritur nga Zëvendësministri i Shëndetësisë, dr. Arsim Berisha dhe Sekretari i Përgjithshëm i MSh-së, dr. Naim Bardiqi, të shoqëruar nga ushtruesi i detyrës së zëvendës-kryeinspektorit Shëndetësor në Kosovë, dr. Shaban Osmanaj dhe këshilltari i ministres Gexha, z. Drin Podrimqaku.
Dy inspektoratet kanë kryer një inspektim monitorues në Spitalin Amerikan në Kosovë ku janë pritur nga drejtori i këtij institucioni Igli Larashi, nga i cili janë njoftuar me strategjinë e përballimit të pandemisë si dhe masat e ndërmarra për të ruajtur shëndetin e pacientëve.
“Në vijimësi të eksperiencës, në manaxhimin e situatës të shkaktuar prej pandemisë, nga ana e grupit të Spitaleve Amerikane në Shqipëri, edhe dega e Spitalit Amerikan në Kosovë realizoi me sukses implementimin e praktikave më të mira të zbatuara, duke i gërshetuar ato me rekomandimet e Ministrisë së Shëndetësisë në Kosovë”, thuhet në njoftim. /Gazeta Shneta/
