Inspektorati Shëndetësor i Ministrisë së Shëndetësisë ia ka hequr reklamën e IVF-it spitalit privat “Bel Medica” në Graçanicë. Frytnimin e Asistuar Mjekësor ky institucion e kryente jashtë Kosovës
Inspektorati Shëndetësor i Ministrisë së Shëndetësisë vitin e kaluar ka kryer inspektime në disa institucione shëndetësore në komunat me shumicë serbe, Graçanicë, Preoc, Livaxhë, Ranilluk, Kllokot, Novobërdë, Partesh, Budrigë e Llabjan.
Kryeinspektorja e ISH-së, Dr. Ardita Baraku, thotë për Gazeta Shneta se pas inspektimeve janë dhënë edhe afatet për zbatimin e rekomandimeve kryesisht për dokumentacionin shëndetësor, hapësirës së punës, informimit të pacientëve, raportimit në SISH, licencimit të stafit, etj.
“Sivjet do të bëhen sërish inspektime për të verifikuar nëse janë zbatuar rekomandimet e Inspektoratit”, ka deklaruar Baraku.
Inspektimet e ISH-së kanë vazhduar edhe këtë vit në komunat me shumicë serbe. Në Graçanicë para pak ditësh i është hequr reklama e IVF-it spitalit privat “Bel Medica”. Ky spital kryente Frytnimin e Asistuar Mjekësor në një institucion jashtë Kosovës.
“Në vitin 2018 është bërë inspektim në Spitalin Privat ‘Bel Medica’ në Graçanicë dy herë – një here ka qenë inspektim i planifikuar ku në raportin e përpiluar (dhe përkthyer) janë dhënë rekomandimet për korrigjime ndërsa, herën e dytë ka qenë para disa ditësh, kur është vërejtur reklama për shërbime të frytnimit të asistuar mjekësor në një pllakat në dalje të Graçanicës”.
“Pas vizitës së Inspektorëve, deklarimit se ato shërbime nuk kryhen në atë spital por jashtë vendit, sqarimit të bazës ligjore dhe masave përcjellëse, pllakati është larguar nga përgjegjësit”, ka deklaruar kryeinspektorja Baraku.
Ky institucion funksionin si Poliklinikë në Graçanicë, ndërsa qendra e tij është në Beograd të Serbisë. Kujtojmë se reklamimi i IVF-it është i ndaluar me Udhëzimin Administrativ 06/2013. Masat ndëshkuese për këtë veprimtari shkojnë deri në 20 mijë euro gjobë si dhe heqje e licencës deri në 3 vjet. /Gazeta Shneta/