Inspektorati Shëndetësor ka qëndruar në “gjumë” sa i përket rastit të logopedit të arrestuar në Podujevë nën dyshimin për ushtrim të dhunës fizike dhe keqtrajtim të pacientes 4-vjeçare.
Logopedi Besart Sokoli i cili u arrestua nën dyshimet për dhunë fizike dhe keqtrajtim të një vajze 4-vjeçare me aftësi të kufizuara, i ka dy ordinanca të licencuara në emër të tij në Ministrinë e Shëndetësisë, shkruan Gazeta Shneta.
MSH ka konfirmuar se ordinanca “Logomedicus” në Podujevë ku dyshohet të ketë ndodhur rasti i dhunës, si dhe ordinanca “Elekuenca” në Prishtinë, janë të licencuara në emrin e Sokolit.
“Nga MSh janë të licencuara dy (2) Institucione shëndetësore me themelues z. Besart Sokoli: Ambulancë e Logopedisë “LOGOMEDICUS” në Podujevë & “ELEKUENCA” në Prishtinë”, thuhet në përgjigjen e MSH-së.
Rasti për të cilin dyshohet Sokoli ka ndodhur të shtunën, ndërsa u arrestua nga Policia e Kosovës të dielën. Rasti është mediatik që nga e diela dhe temë kryesore në media gjatë ditës së djeshme.
Përkundër kësaj Inspektorati Shëndetësor ka qëndruar në “gjumë” duke mos ndërmarr asnjë veprim e madje as inspektim për rastin.
“Inspektorati Shëndetësorë do të kryej inspektim në lidhje me rastin në fjalë”, kjo ka qenë përgjigja e MSH-së gjatë ditës së sotme kur është pyetur nga Gazeta Shneta nëse ISH ka kryer inspektim.
Inspektorati Shëndetësor udhëhiqet nga zv.kryeinspektorja Nora Kursani.
Ligji për Inspektoratin Shëndetësor e rregullon veprimtarinë e inspektorëve. Sipas Nenit 6, pika b) inspektorët mbikëqyrin “Mënyrën e pranimit, trajtimit dhe lëshimin e pacientëve nga institucionet shëndetësore.
Ndërkaq Neni 7, pika 7.11 “Ndalon plotësisht veprimtarinë e caktuar apo pjesërisht të institucionit shëndetësor deri në plotësimin e kushteve ligjore”.
Në raste të ngjashme kur dyshohet për shkelje të ndryshme profesionale ose etike në institucione shëndetësore, Inspektorati Shëndetësor me automatizëm inicion inspektim. /Gazeta Shneta/