Instituti Kombëtar furnizohet me 5 mijë teste për Covid-19 brenda dy ditësh

2020-04-25 në ora 13:42

Instituti Kombëtar i Shëndetit Publik është furnizuar me 5 mijë teste për diagnostikimin e koronavirusit brenda dy ditësh.

Në Institutin Kombëtar gjatë ditës së djeshme operatori ‘Eramed’ i ka liferuar 2 mijë teste nga kontrata që e ka me Ministrinë e Shëndetësisë. Lajmi është konfirmuar nga zëdhënësi i MSH-së Dr. Faik Hoti, shkruan Gazeta Shneta.

“Operatori ekonomik dje i ka dorëzuar 2 mijë teste RT PCR për diagnostikimin e Covid-19 nga kontrata që e ka me Ministrinë e Shëndetësisë. Ndërsa sot Instituti ka pranuar edhe 3 mijë teste të tjera donacion nga UNDP”, ka deklaruar Hoti.

Valbona Bogujevci nga UNDP ia ka dorëzuar testet sot shefit të laboratorit të Mikrobiologjisë Molekulare Dr. Xhevat Jakupit.

“Në ditët dhe javët e ardhshme, UNDP në Kosovë, së bashku me Agjencitë e tjera të OKB-së dhe partnerë të tjerë të zhvillimit do të vazhdojnë të kontribuojnë për mirëqenien e të gjithë qytetarëve të Kosovës”, thuhet në njoftimin e MSH-së.

Në Kosovë deri më sot janë testuar gjithsej 5.890 mostra të dyshuara, nga të cilat kanë rezultuar pozitive 703 persona. /Gazeta Shneta/