Një studim i ri tregon se modelet e inteligjencës artificiale dështojnë në më shumë se 80% të rasteve për të dhënë një diagnozë fillestare të saktë, duke ngritur shqetësime për përdorimin e tyre të pavarur në mjekësi. Edhe pse këto sisteme kanë përparuar ndjeshëm, ato ende nuk zotërojnë aftësitë e arsyetimit klinik të nevojshme për përdorim të sigurt.
Studiuesit analizuan 21 modele të mëdha gjuhësore, përfshirë versione të avancuara të platformave të njohura të AI-së, duke përdorur raste klinike të standardizuara, shkruan burimi Euronews Health transmeton Gazeta Shneta.
Modelet u testuan në disa hapa: vendosja e diagnozës fillestare, kërkesa për analiza, arritja e diagnozës përfundimtare dhe planifikimi i trajtimit.
Rezultatet treguan se, megjithëse modelet kishin performancë të mirë në përcaktimin e diagnozës përfundimtare (me saktësi nga 60% deri mbi 90%), ato hasën vështirësi të mëdha në fazën fillestare.
Në veçanti, ato dështuan në krijimin e një “diagnoze diferenciale” – një hap thelbësor që ndihmon mjekët të dallojnë mes sëmundjeve me simptoma të ngjashme.
Ekspertët theksojnë se pikërisht kjo fazë përbën “artin e mjekësisë”, ku kërkohet analizë e thellë dhe menaxhim i pasigurisë.
Modelet e AI-së rezultuan të dobëta në këtë drejtim, sidomos kur informacioni ishte i kufizuar në fillim të rastit.
Megjithatë, performanca e tyre përmirësohej ndjeshëm kur u jepeshin më shumë të dhëna, si rezultate laboratorike apo imazheri mjekësore. Kjo tregon se këto sisteme funksionojnë më mirë kur informacioni është i plotë, por jo në situata reale ku të dhënat janë të pjesshme.
Autorët e studimit theksojnë se inteligjenca artificiale ende kërkon mbikëqyrje të ngushtë nga profesionistët shëndetësorë.
Për publikun, rekomandimi është i qartë: këto teknologji duhet të përdoren me kujdes dhe nuk duhet të zëvendësojnë ekspertizën e mjekut. /Gazeta Shneta/