Ish-rektori i Universitetit të Kragujevcit, Nebojsha Arsenijeviq dhe krahu i djathtë i tij, ish-dekani i Fakultetit të Mjekësisë, Predrag Çanoviq, janë arrestuar para disa ditësh me urdhër të Prokurorisë për Krim të Organizuar në Kralevë.
Të dy janë arrestuar për keqpërdorim të detyrës zyrtare, përfshirë përvetësim në lidhje me diplomat që u jepnin shtetasve shqiptarë dhe kroatë dhe patën përfitime shumëmilionëshe.
Siç thuhet në njoftimin e MPB-së, dyshohet se ish-rektori dhe ish-dekani kanë ndërmjetësuar në mënyrë të kundërligjshme me mësimdhënësit dhe punonjësit e administratës në Fakultetin e Shkencave Mjekësore, për regjistrimin e shtetasve të huaj në kundërshtim me rregulloren.
Ata dyshohet se kanë regjistruar 45 shtetas kroat në vitin e tretë të programit infermier/teknik dhe kanë lëshuar 44 diploma.
Ish-dekani i Fakultetit të Mjekësisë dyshohet poashtu se ia ka mundësuar një kandidati mbrojtjen e doktoraturës edhe pse e dinte se kandidati nuk ishte i regjistruar në studimet e doktoraturës.
Siç shkruan Blic.rs, ky medium pati raportuar për përvetësim, poshtërim të punonjësve, shkarkime dhe nepotizëm të rektorit arrogant Arsenijeviq për më shumë se gjysmë viti.
Arsenijeviq dhe Çanoviq u arrestuan në Kragujevc dhe u dërguan në Kraljevë në Prokurori. /Gazeta Shneta/