Në Klinikën e Neurologjisë në QKUK janë duke vazhduar punimet për renovimin e disa hapësirave ku do të krijohet “Stroke Center”.
Punimet për këtë qendër janë vizituar sot nga ministri në largim i shëndetësisë Uran Ismaili dhe drejtori i SHSKUK-së Dr. Basri Sejdiu. Ky i fundit ka bërë të ditur se tanimë në këto hapësira është vendosur CT e re, e cila është në fazën e montimit përderisa së shpejti pritet vendosja e Rezonancës së dytë magnetike.
“Kemi investuar edhe në edukimin dhe trajnimin e stafit. Investimet në këtë projekt pasojnë investimet që bëmë për kujdesin e zemrës. Po punojmë në projekte të tjera, që në fokus e kanë kujdesin dhe ofrimin e shërbimeve shëndetësore për pacientë”, ka deklaruar Sejdiu.
Në anën tjetër Ismaili ka thënë se në këtë Qendër e cila do të jetë Nacionale për trajtimin e sulmeve në tru, janë investuar 1.3 milionë euro. “Rezonancë të re magnetike, CT dhe infrastrukurë moderne. Sulmet në tru janë prej shkaktarëve kryesorë të vdekjeve dhe paralizës për të cilat nevojitet një reagim i shpejtë brenda 3 orëve. Me hapjen e kësaj qendre ne po krijojmë kushte që të shpëtojmë qytetarët tanë nga vdekja, paraliza dhe shpenzimet e larta financiare”, ka thënë Ismaili. /Gazeta Shneta/