Ministri i Shëndetësisë Uran Ismaili nëpërmjet një postimi ka lavdëruar Agjencionin Kosovar për Produkte Medicinale për heqjen e listës së pritjes për regjistrimin e barnave.
“Pengesat burokratike kanë penguar konkurrencën dhe nga kjo kanë pësuar pacientët, që nuk i kanë gjetur në Kosovë barnat për të cilat ata kanë pasur nevojë. Sot jam njoftuar nga AKPPM-ja se pas një pune disamujore është hequr edhe lista e pritjes për regjistrimin e barnave, duke krijuar një klimë për t’u trajtuar të gjitha lëndët shpejt dhe drejt”, ka shkruar Ismaili.
Ai ka thënë se me heqjen e kësaj liste do të shtohen llojet e barnave dhe edhe mundësia e qytetarëve për shërim.
“Me heqjen e kësaj liste, numri i barnave që do të jenë prezentë në tregun e Kosovës do të rritet dhe qytetarët do të kenë më shumë zgjidhje për sëmundjet e tyre. Ky hap dhe heqja e listës së pritjes në dhënien e banderolave që kishte ndodhur para dy muajsh, po mundësohet që AKPPM-ja ta përmbushë misionin e saj për mbrojtjen e shëndetit publik të popullatës përmes garantimit të cilësisë, sigurisë dhe efikasitetit të barnave në Republikën e Kosovës”, ka shkruar ministri. /Gazeta Shneta/
